يوميات شاب فقري

فقري
هو شاب مصري بالرغم من كل ما يواجهه من مشكلات تدل علي أنه بالفعل “فقري”
إلا أنه يري أن لكل شيء سبب وأن مفيش حاجه اسمها شاااب فقري وأن كل ما يحدث
ما هو إلا مجرد ” قدريااات ” لا علاقه له فيهاا ألا أنه مؤخرااً بدأ يجد
ان تلك القدرياات زائدة عن الحد المعتاد عن الجميع وبدأ يسترجع ويتذكر
حياته وكل تلك القدريااات والتي ليس لها أي تحليل منطقي غير أنه شاب فقري


الحلقة الأولي :-

انتهيت من استخراج اوراقي الخاصة بالسفر إلي البحرين ولكن هناك سؤال يدور بخاطري …. فمصر كما نري جميعاً تمر بظروف انتقاليه صعبه.

والبحرين أيضاً تمر بظروف صعبه جدااً فقد تم هدم ميدان اللؤلؤه والذي كان يتظاهر فيه المتظاهرون . وهنا تثور المشكله

مفيش
حد من المصريين حالياً بيسافر البحرين طب انا لو روحت احجز عشان اسافر
اكيد مش هلاقي طيارات رايحه البحرين طب لو لقيت ماهو ممكن جدااً مايكونش في
حد مسافر غيري ساعتها هايخلوني قاعد لغاية الطياره ما تحمل او لو الطياره
ناقصه نفرين ولا تلاته ممكن يقولولنا ياجماعه الطياره ناقصه نفرين ايه
رأيكو نطلع ونقسم تمنهم عليكوا ودي طبعاً حاجه مكلفه جدااً بالنسبالي.

والحجه اللي كنا بنعملها دايمااً اننا نقول للسواق :

“ياسطي اطلع وان شاء الله ربنا يرزق في السكه”

معتقدش ابدا انها هتكون مقنعه للطيار .

انا عارف كويس انكو دلوقتي بتقولو ايه اللي انت بتقوله ده ياعم دي طياره مش ميكروبااص .

انا
عارف كويس قوي انها طياره مش ميكروباص بس بما اني رايح اركبها فمش بعيد
تتقلب ميكروباص , ومش بعيد كمان الاقي حد حاجز الكنبه اللي ورا. ومش بعيد
كمان ان البحرين نفسها يضمو البحرين علي بعض ويخلوهم بحر واحد او حتي
“شاطيء”

اه شاطئ ليه لاء اذا كنت اول ما قررت اقدم ورقي في التجنيد
واحنا بقالنا سنين مابنحاربش ومفيش احتمال اننا نحارب تقوم ثوره مصريه
وينزل الجيش الشارع وياخدو كل الدفعه اللي مقدمه وياخدو كمان ناس من
الدفعات القديمه , وحتي لما عملت الكشف الطبي وطلعت رسمياً معافي من
التجنيد قابلت طلعلي “الصول عطيه ” فاكرين فيلم اسماعيل يس في الحربية ؟
فاكرين الشاويش عطيه ؟ هو ده ب الظبط الصول عطيه بعد ما خلصت ورقي كله في
التجنيد مفروض اني اروح استلم الاعفاء بتاعتي بعد 10 ايام روحت بعد 10 ايام
لقيت سيادة الشاويش عطيه .

أنا : لو سمحت انا الاعفا بتاعتي معادها النهارده

الصول عطيه: فين الرقم الثلاثي بتاعك.

أنا : اديتله الورقه اللي فيها البيانات بتاعتي ومن ضمنها الرقم الثلاثي بتاعي.

الصول عطيه : لسه ماجاتش تعالا كمان اسبوع .

……………. بعد مرور اسبوع .

أنا : لو سمحت انا الاعفا بتاعتي معادها النهارده

الصول عطيه: فين الرقم الثلاثي بتاعك.

أنا : اديتله الورقه اللي فيها البيانات بتاعتي ومن ضمنها الرقم الثلاثي بتاعي.

الصول عطيه : لسه ماجاتش تعالا كمان اسبوع .

ومرت الاسابيع علي هذا الحال ….

اصحابي كانو بيقولولي اني فقري بس انا كشاب متفائل كنت بقول لاااااا وكنت ببص علي نص الكوبايه المليان فبالرغم من تأخر الاعفا بتاعتي

الا
اني استفدت كتير من التجربه دي فمن اهم الفوائد اني اتصاحبت علي الشاويش
عطيه اللي انا غالبا مش هاشوفه تاني بعد ما استلمت الاعفا بس المثل بيقول
معرفة الرجالة كنووز . وكمان عرفت مكان الدوسيه اللي بيدور فيه الشاويش
عطيه واسمه ،يعني لو حد من اصحابي رايح يستلم الاعفا بتاعته هاقدر افيده
واقوله يروح فين بالظبط بدل مايقعد يدور وده في حد ذاته يعتبر خبرة والخبره
ما بتجيش بالساهل.

“في الحلقة القادمة : ” فقري هو السبب في تنحي الرئيس مبارك ويطالب كل اللي بيركبوا الموجه انهم يعترفوا ب الحقيقه”

إلي القاء مع الحلقة الثانيه من ” يوميات شاب فقري